Dorch et Aubachtal

Dorch et Aubachtal

von Jürgen Herbst

Jedes Johr werd vom Verein Nidderbiewerer Bürjer en Tour oder en Fahrt iplahnt. Dissjohr hamma oas für en Wanderung dorch et Aubachtal enschiede.

Am 15. September, ed wor en wunderbare Sonndach, do hamma met zwei Busse 103 Läjt noa Owerroade ifahre. Denn en Owerroade ensprengt de Aubach, der joa emmerhin Mette dorch Nidderbiewer läft un an (freher) Biensmill en de Wittbach fleßt.

En Oweroade wurdema vom Bürjermäster Herr Dills un vonem Herr Schmitt begrüßt un all hannse dat Wässerche am „Bur“ bestaunt, dat doa su vorsichhin plätcherte.

Net nur dat Wasser, och mir hann oas off de Wech imacht en et schiene Aubachtal. De Herr Schmitt es met oas igange un hätt unerwejens emmer widder wat erklärt.

De Aubach wor en unheimlich fleißische Baach, er hätt en Unzahl von Milleräder anidrewwe. Häj hätt en Knochemill istanne, hätt der Herr Schmitt erklärt, do wor freher en Itreidemill, wäjder unne em Aubachtal hannse freher Kubber- un Äjseerz verarwäjt. Sugar en Silwerschmelz un en Kubberhammerwerk, en Ölmill un Sejewerke woren em Aubachtal.

Als mir die Hälft vom Aubachtal henner os hatten, hamma an de Feschwäjere von Alsdorfs Günter en Rast imacht. Ze esse gof et en defdische Gullaschsopp, och fir de Durscht wor isorcht.

Bäj zünfdischer Musik vom Schifferklavier konnten sich all e bisje ausrohe, denn bes zum Schwaneteich woren et noch 8 km. Noa äner Stond Offenthalt wor der Rest bes noa Owerbiewer en Klänichkeit. Doa hätt de Bus iwaht om oas widder noa Nidderbiewer zefahre. De lewe Gott hattet good met oas imeint, mir hatten e herrlich Wedder un rond e remm wor et moal widder en ilungene Sach.

Die Kommentare sind geschloßen.
nach oben