Woor de Wender frejer schiener?

Woor de Wender frejer schiener?

Woor de Wender frejer schiener?

Von Anita Trostel

 

Dat hann isch misch  ifroachd, wie de läzde Wender moa widder su mell iwese es.

Isch erinneren misch, dat off jeden Fall de Widdbaach un de Hammergraawe efdasch zooifrore wooren. Off ed Eis giehn doafd isch awer off ga kääne Fall. Mäi Ällere un Grußällere hann ma emma vazehld, wer schon alles em Eis enibroche un sugar och unnerigange es. Tatsäschlisch hann isch och sälwa erleefd, dat em Hammergraawe en Jong enibroache un vasoffe es. Dat häd misch dumoals siehr medinomme, der woor unifähr su ald wie isch un mir hann en de Kolonie och menanner ischbilld.

Isch doarfd alsu nur mem Babba odda mem Ubba off ed Eis. Doa sein isch dann an de Hand moa vomm Schdrandbad bes an de ahl Klous un widder zeregg un dat woor dann mäine Eisausfluch. Anschließend hann isch vomm Steesch aus denne Jonge zooiguggt, wie die Eishockei ischbilld hann. Als Schäif hadden se en ahle Biggs un Äsd, die unne äbbes ibooche wooren, wooren die Hockeiknebbele. Su sein se iwwer dat Eis iroasd un hann en Hoafe Schbass ihad. Widder annere, meisdens wooren dat Mädscha odda Froue, hann vasoochd elegant ze loafe, wie ma dat em Fernsiehn vafolje konnd. En Eisprinzessin woor awer ned debei.

Wann isch Glegg ihadd hann, hama Sonndaachs en Schbaziergang noa Ahlewidd an ed Wehr imachd. Doa woor dann en Mordsbedrieb un mir sein es bissje länger off em Eis iblewwe. Isch erinneren misch an en Mann, der iloafe es wie dumoals de Hans-Jürgen Bäumler. Vierwärds un reggwärds, off änem Bein un med Piruädde. Im häd nur ed Marika Kilius ifähld. Isch woor emmer ganz begeisdad.

De Diggs Gass ronner sein ma Schlidde ifahre. Manschmoa sein ma iwwer de Aubachschdroaß, die dumoals noch Friedrisch-Ebert-Schdroaß ihäße häd, bes an de Aubach. Dat konnd ma du noch mache, ed koamen joa noch ned su vill Audos. Wann inoochd Schlidde doa wooren, hann ma die annenanner ibonne un hann en lange Bob imachd. Dat woor en welle Fahrt un mir sein och ald emikibbt. Mäine Broder häd moa ned de Kiehr ikreschd un es gähn de Mouer vomm Schmandgässe ifahre. Ed Änn vomm Lied woor e Loch em Koabb un paar Daach lang hadden ma Schliddevabod.

Schnieballschlachde hann isch ned su geer imoochd, besonnersch ned off em Schullhoff, doa konnd isch ned su good aafhoue. Ed woor unaninehm, wann ma en Ladung Schnie en de Kraache ikreschd häd un dann mem nasse Pullower en de Klass isässe es.

Wann de Widdbaach su zoifrore woor un ed koam Tauwedder, dann sein die Eisscholle idrewwe un hann sich dann en de Kolonie am Quädschegaade ischdoud. Die lochen  bes off de Schdoaß un mir hadden widder wat ze gugge odda mir sein vonn Scholl ze Scholl ischbrunge, wat ma joa eischendlisch och widder ned doarfden, weil dat ifehrlisch sein solld.

Unifehrlisch wooren die Schniemänner, die ma iboud hann. Ed goaf ofd su vill Schnie, dat ma rischdije Kawänzmänner boue konnden und ned su leizije Kerlscha, die ma häid nur noch hinkräid, wama Glegg häd. Eimoa hann isch vomm Ubba de Zilinder aus em Schrank iholld un demm Schniemann off de Koabb isetzd, doa woor de Ubba awer ned su begeisdat von nun isch hann dischdisch ischannt ikreschd.

Wann isch dat jedz alles su bedrachden, dann kann isch die Froach, ob de Wender frejer schiener woor, nur med joa beandworde. Allerdings es ed awer och su, dat ma dat, wat vagange es, emmer em bessere Lischd siehn daid.

 

Die Kommentare sind geschloßen.
nach oben