Alldaachsmasge

Von Anita Trostel

En de Coronazeid lierd ma lauder näije Begreffe. Isch hann mir idaachd, doa kennd isch moa en klääne Ischischde drewwer schräiwe.

Zem Beischbill iwwer die Alldaachsmasge, denn FFP2-Mund/Nase-Schutz, die AHAL-Rejel un die Masgeflischd. Dat sein Begreffe, die ma jedz su ofd hierd, die kommen beschdemmd demmnägsd en de Duden. Suga die Kennergaadekenner wessen schonn, dat med Alldaachsmasge kään Fasnachsmasge imähnd sein.

Su winnisch, wie am Anfang vonn der Coronapandemie Masge doa wooren, su reischlisch gefd ed se häid. Doa gefd ed die Eimoamasge, die sein meisdens himmelbloa, die FFP2-Masge sein meddlerwäil Flischt bäim Enkoafe un em Bus un de Bahn. Die hann meddlerwäil die Schdoffmasge en alle mischelische Forme, Farwe un Mosdere, aafilösd. Med denne FFP2-Masge kama modisch nix mieh rausholle. Bäi denne Alldaachsmasge woor dat annaschda. Mansche sein suga inau passend zemm Outfit imachd woore. Wer wat off sisch hahle doad, häd se nadierlisch vomm Edelschnäider iholld. Ganz hardisoddene hann  sisch einfach wie de Zorro en Schälsche vier Mund un Nas ibonne. Dat es cool, hieß ed dann.

Die Eimoamasge hann awer erjendwatt an sisch, dat die, oahne, dat ihr Dräja oadda Dräjarinne wat devonn medkräijen, einfach su aaffallen. Ma siehd se häid nämlisch emma mieh off de Schdroaß oadda om Dreddowar läije. Ihr Dräja oadda Dräjarinne kennen doavonn nix märge, weil die sons joa die Masge offraffe un en de nägsde Pabierkoarf schmeise däden. Es doch su, oadda täuschen isch misch doa?!

Fier die Schdoffmasge wooren die heimische Nähmaschinne moa widder zemm Ensatz ikomme. Ed sein su vill imachd woore, dat ed Gummiband iwwerall ausvakoafd iwese es un ma ed nur noch iwwer Beziehunge ikreschd häd. Wer häd dat moa idaachd, dat ed suwat gewe däd.

Wann die Masge rischdisch sedzen, dann sein de Mund un de Nas ganz zooidäggd. Die Brelledräja beschweren sisch emma, dat doadoarsch de Brell beschlääd un wama die Mask aafnemmd, bläifd ään Seid garandiert am Brellebischel hänge.

Awer ed gefd och Läid, die loassen ihre Rieschkolwe iwwer demm Rand von der Mask rausgugge. Machen die dat weil ed besser aussiehd, oadda waremm? Polidiger hann ed suga vierimachd. Dann gefd ed noch die, die mähnen, dat ed reischd, wann se nur ed Kinn drenn enpacken. Ma kann sisch joa soss ned rischdisch unnerhahle oadda en Zigaredd roache. Die ganz Informierde, die duun iwwerhoubt kän Mask en ed Isischd. Denne es ed igaal, wat med de annere Läid passierd. Naja, ed gefd ewe en Hoafe Individualisde. Doabei es meddlerwäil bewisse, dat die AHAL-Rejel hällfe daid, dat Virus aafzehahle. Wat AHAL häßt wessd ihr doch all, nämlisch – Aafschdand hahle, Hänn wäsche, Alldaachsmask an un lefde. Ed es doch su einfach!

Wama su en Mask em Isischd häd, dann muss ma doadronner och e freindlisch gugge, doamed die Ooche leuschden. Dann wääs dat Gähniwwer, dat doa käne Brommeler oadda Emmerbies dronner es. Laud un deutlisch schwätze muss ma och, soss werd aus „en schiene Hood“ leischd en „schiene Idiod“. Dat kann dann dischdisch en ed Ooch giehn.

Ed werd emmer widder isoahd, ma soll, wama die Mask aafdaid, se ned zesammeknuddele un en de Boggse- oadda Jaggetäsch schdobbe. Ma soll se en e Plasdiktiddsche doan, su wie de Frau Märgel oas em Fernsiehn dat vierimachd häd. Vill Läid loassen se och einfach an änem Uur bammele oadder vier de Brosd an nem Keddsche. Widder annere schiewen se unner ed Kinn un droahn se wie e Schälsche oadda hann se am Arm oadda Handilenk.

Ja, un wama die Mask paar Schdonne anihad häd, dann es vasiffd un ma soll  die Eimoamask un die FFP2-Mask foaddschmeise un die annere  unbedingt wäsche. Womed un wie, dat es widder wat fier die Schbezialisde. Häi die Vierschläsch: bäi 60 Grad un med Vollwäschpolwer en de Wäschmaschinn, em Debbe oadder em Schnellkochdebbe koache oadda nass en de Mikrowell schdobbe fier e paar Emdrähjunge.     Isch wäschen oas Masge bäi 60 Grad en de Wäschmaschinn, wann isch en Maschinn med annere Wäsch machen. Bes doahin bläiwen die vasiffde Alldaachsmasge en demm Extratiddsche.

Zem Schluss well isch noch en Schbruch bränge, denn isch näilisch moa offischnabbt hann, der ging su:

Ed es besser su en Labbe em Isischd ze hann, als wie en Zeddel an de digge Zing.

Demm kann isch voll un ganz zoschdemme und desweje hahlen isch misch an die Masgeflischd un die AHAL-Rejel un duun die Mask och rischdisch an.

Doamed dat alles ned esu bierernst es, sähd mäine Mann en säinem badische Dialekt „Mauldäschle“ iwwer die Mask un isch hann fier misch off Biewerer Platt dat „Schnissegadinsche“ erfonne.

Bläifd isond un offreschd!