Oas Vierroadskämmasche

Oas Vierroadskämmasche

Oas Vierroadskämmasche

Von Anita Trostel

Had ihr och e Vierroadskämmasche? Mir hann zwar keins, awer mäine Mann häd e ganz doll Regal, med Diere devier, unner de Kellerdräbb ibout un dat häßt bäi oas och Vierroadskämmasche.  Doa lacherd alles, wat oase Haushalt su an Vierroad brauch, z.B. H-Mellisch, Nuddele, Reis, Ennimachs, Mamelaad, Weinflasche un Wasserkesde.

Emma, wann isch wat aus em Vierroadskämmasche huh en de Kisch hollen, schräiwen isch dat off en Zeddel un füllen dat bäim nägsde Enkoaf widda off. Nau kend ma mäne, dat ed en oasem Vierroadskämmasche wärglisch vierbildlisch vier sisch gähd. Awer Hosdekooche!

Erjendwie muss bäi mir em Ihirnskäsdje wat kabodd sein. Isch giehn joa grondsätzlich bäim Enkoaf noa mäinem Zeddel vier, awer dann schdiehn isch vier em Regal med de Bixe med ruude Kabbes und schbondan greifen isch zoo, weil isch dän’gen, dat ma denn beschdemmd moa good ibrauche kennden. Inausu gähd ed ma med färdije Tomadesoß un Zitronat en Schdeggelscha.

Dann kommen isch heim un roumen oas Vierroadskämmasche en. Alles schien un good, awer doa schdiehn schonn fönnef Bixe ruude Kabbes, 3 Gläsa färdije Tomadesoß un 3 Päckelscha Zitronat en Schdeggelscha. Isch wäß ned, waremm isch emma schbondan noa denne Sache greifen. Ruude Kabbes essen ma zwar geer, awer meisdens machen isch denn selwa,  färdije Tomadesoß maach käner vonn oas, die mischd mäine Mann fresch vill bessa un Zitronat med Schdeggelscha kimmd och nur moa fier Chresdaach zem Ensatz.

Isch soahn ma emma widda: „Loass de Fingere devonn, awer frejer oadda schbäda hann isch doch widda zoischloan. Oase Vierroad wägsd langsam awer sischa, ma kennd mähne, dat isch bäi denne Sache Knäbb off de Ooche häd. En demm Oocheblegg wo isch die Sache koafen, sein isch devonn iwwerzeuschd, dat ma oas erjendwann moa freien, dat ma die Sache em Vierroadskämmasche hann, weil ma se ganz dringed brauchen. Awer isch gloowen, der Daach kimmd nie!

Brauch ähner vonn eisch zoofällisch en Bix ruude Kabbes oadda färdije Tomadesoß?

Kommentare sind geschlossen.
nach oben