En Zeide von Corona
En Zeide von Corona
Von Anita Trostel
Wat hama an Silwesda 2019 fier en Schbass ihad. „E näi Johrzähnd un – 2020 – wat fier en schiene Zahl, dat weerd beschdemmd e good Johr“. Awer Hosdekooche, ed koam annaschda. Schonn Anfang vomm Johr koam die Noarischd, dat en China e näi Virus säi Unwese dräifd. En Hoafe Kran’ge, en Hoafe Duude, käner doarfd mieh renn und käner mieh raus.
Awer China woor joa weit foadd, bäi oas moochen die Läid sisch noch kään Idan’ge. Doch off eimoa woor ed doa, dat Coronavirus. En Heinsbärsch en NRW häd ed zooischloan, Fasnachd solld Schold sein, weil doa vill Läid off änem Hoaf wooren un dischdisch „ibützd“ hann.
Awer dat Virus es ned en Heinsbärsch iblewwe, emmer mieh Gejende bäi öas wooren bedroffe. Dann koamen die Noarischde aus Italie un Schbanie, die doaden Angst mache. Die Kran’gehäuser wooren iwwerfülld un med de Beerdijunge koam ma nimmi noa.
De Johnson en England un de Trump an Amerika hann erschd vazehld, dat weer alles ned su schlemm, doafier koam ed doa dann emmsu digger. Ed häd och bäde good erwischd, se loochen sugar off de Intensivschdazion.
Bäi oas es dann och alles annaschda wie sos iwoore. Die Schulle, Wärtschafde, Ischäfde un Firme wooren zoo. Ma doarfd sisch nimmi besooche un nur noch ze zwedd schbaziere giehn. Ma mussd 1,50 m Aafschdand ze Annere hahle. Die Läid en de Senioreheime kroochen käne Besuch mieh un die Ummas un Ubbas hann am Rad idrähd, weil die Än’gelscha nimmi nimmi komme doarfden.
Awer isch muss soahn, die meisde Läid wooren siehr ensischdisch un hann sisch an su good wie alles ihahle, wat fafüschd woore es. Ed es suga en gruße Hellefsbereitschaft offikomme. Jonge hann fier Ahle enikoafd un annere Sache erledischd. Wärschafde hann fier dat Flejepersonal oadda Obdachlose ikochd, vill Priwadpersone hann die emfohlene Schutzmaske inähd, weil die Industrie nimmi med de Liwwerung noahkoam un, un, un.
Plötzlich häd ma dat Leewe med annere Ooche bedrachd. E schien Oamendässe med de Kenner oadda med Freunde, en Anroof bäi de ahle Ällere, e schien Konzert oadda en Kärschgang, dat woor alles su selbstvaschdändlisch. Jedz wossd ma dat offeimoa vill mieh ze schädze. Solld dat Coroanavirus drodz allem Lääd, wat ed bränge doad, doch fier wat good sein? Awer dat bläifd en Iheimnis fier de Zokunefd, dän’gen isch.
Em Somma ging ed dann, weil die meisde Läid sisch drann ihahle hann un man konnd dat Ganze widder bissje loaggere. Awer em Härbst es ed widder loassigange. Der Lockdown light, wie ma isoad häd, häd nix ibraachd un ma häd die Schrouf e bissje mieh anizooche. Suga iwwer Chresdaach un Näijohrschdaach goaf ed Kondaktbeschrän’gunge un Fasnachd es ausifalle, weil ed jedz Mudadzione vonn demm Coronavirus goaf.
En de Zweschezeit goaf ed och Impfschdoff. Awer ed woor e bissje ze winnisch beställd woore un desweje häd ma erschd moa nur die ahle Läid en de Aldersheime impfe kenne. Moa siehn, wie ed wäider gähd.
Zoo demm Ganze passd die urahle Ischischde vonn dem Bauer un demm Glegg. Se weerd en vill Fassunge vazehld un se schdammt, wie dat Coronavirus, aus China. Ich well se moa vazehle:
Ed woor emoa en Bauer, demm es säi Peerd foaddiloafe. „Wat fier en Unglegg“, hann die Läid isoahd. Der Bauer awer häd imähnd: „Glegg oadda Unglegg, wer wäß dat schonn?“ Koaze Zeit droff, koam dat Peerd widder un med imm zwei welle Peerd. „Wat fier en Glegg“, hann die Läid widder soahd. Un demm Bauer säin Antwoord woor: „Glegg oadda Unglegg, wer wäß dat schon?“ Der Sohn vonn demm Bauer wolld eins vonn denne welle Peerd zooräide. Doabei es e awer aafiwoarfe woore un e häd sisch ed Bein ibroache. „Wat fier en Unglegg“, hann die Läid isoahd. Awer de Bauer sähd: „ Glegg oadda Unglegg, wer wäß dat schonn?“ Ed häd ned lang idouad, doa es en Kriesch ausibroache. All jonge Männer sein enizooche woore un vill sein ischdoarwe. Demm Bauer säine Sohn woor awer wejen demm ibroachene Bein ausimosdat woore un häd iwwerleefd. „Wat fier en Glegg“, häd ed widder vonn denne Läid ihääse. Der Bauer häd awer widder ze Antwoad igeewe: „Glegg oadda Unglegg, wer wäß dat schonn?“
Isch soahn zemm Schluss vonn mäina Ischischde och: „Corona, Glegg oadda Unglegg wer wäß dat schonn?“
Machd eisch eija ejene Idan’ge.
14.2.2021