Wie ma en Biewer noch e Schdrandbad hadden

Von Anita Trostel

 

Dat Biewere Schdrandbad am Widdbaach woor bes en de Medde von de Fuffzijer Johre en Betrieb. De Endredd woor billisch, 10 Fännisch oahne Kabin, meisdens fier de Kenner un die Juchendlische, 15 Fännisch med Kabin, fier die Erwachsene. Reechds wooren die Kabine fier de Männer und links fier de Froue.

 

Die Liejewiss es dumoals noch rischdisch bräd iwese un vonn doa aus ging en Badeschdeesch en ed Wasser. Off de annere Seit, an de deefsde Schdäll, goaf ed e Schbrungbreed. Wemm ed ned inoochd woor, med em einfache „Käbbert“ oadda na Aaschbomb vomm Schbrungbreed ze hebbe, der häd iwaachde Schbreng vom Schdeesch, alsu vonn de Bregg aus imachd. Sugar vomm owerschde Breggebooche sein se ischbrunge. Wie isch misch erinneren, wooren dat awer nur die Jonge. Awer mäin Mamma häd emmer vazehld, dat frejer Schenks Hanna, rischdisch häd ed joa Hanna Mischels ihäse, denne Jingelscha iwisse häd, wat ed konnd und och vomm owere Booche ischbronge es. Em VNB-Aschiv hann ma  e Bild, wie ed schbringt. En de dreißijer Johre häd ed Hanna sugar an de Deutsche Schwemmmäsderschafde en Berlin medimachd.

 

Die Kenner hann häi ihr Freizeit un die ganze Ferie vabraachd un hann häi och schwemme iliehrt. Isch kann misch noch erinnere, dat die Jonge sisch welle Wasserschlachde off offipompte Rääfe iliwwert hann. Ballschbille, Ringtennis, Boot fahre, alles woor mischelisch un erlaubt. Die klääne Kenner hann em niddere Wasser ischbilld un imaschd un ofd es och en Schebb voll Matsch off die Wiss iflooche, wat vonn denne, die off de Wiss loachen, med em laude Ischrei quiddierd woore es. .

Un och fier de Schullschboad sein ma en ed Schdrandbad. Doa muss isch fier misch awer soahn, dat isch dat ned su geer imachd hann. Bäi denne Toannübunge em Wasser sein isch moa bahl aafisoffe.

 

Dat de Widdbach en de droggene Sommere siehr dräggisch woor, häd käner ischdiert. Eimoa soll ed vierikomme sein, hann isch vazehlt ikreschd, dat en Hoafe dudde Fesch en de Baach idrewwe sein. Die Kenner hann sisch en Schbass draus imachd sisch med denne duude Fesch ze bewerfe.

Inausu winnisch hann die Radde ischdiert, die sisch hauptsäschlisch off de annere Widdbaachseid offihahle hann. Mansche Jonge hann sisch doamed ibresd, dat se widder en oandlije Kawänzmann isiehn hadden.

 

Wer ze lang em kahle Wasser woor un schonn bloae Lebbe ihad häd, der häd sisch einfach off die Pladde vier de Emkleedekabine ilähd un sisch offiwärmt oadder e es an de Klous un häd sisch doa off ed Wehr isädzd.

 

Klingelhöfasch hann denn Kiosk an de Emkleedekabine ihad un wooren gleischzeidisch och Bademäsder. Mir Kenner hann off ed Woord ihierd, wann Klingelhöfersch Ella säin Machdwoord ischwädzd häd.

Am Kiosk hann ma oas Ischnuggels oadda e Eis ikoafd, wann ma vonn dehäm en Grosche mieh medikreschd hadden.

 

Manschmoa goaf ed an denne Kabine e gruuß Ischrei. Dann hadden die Jingelscha sisch moa widder off ihre Beobachdungsposde an de Sammelkabin fier die Mädscha ischlesche. Die hann dann idoahn, als ob dat wat ganz schlemmes weer un hann se mem laude Ischrei widder vajaachd.

 

Medde de Fuffzijer Johre woor ed dann aus mem Schdrandbad. Ed es noch inoffiziell benodzd woore, awer noa un noa es alles vafalle un schbäda häd ma dann och e Badevabot em Widdbaach erloasse.

 

Ed es schad, dat dat su ikomme es, weil doamed och widder e Schdegg Dorf un Imeinschaft foadd woor.