Mäi Affekäppsche

Mäi Affekäppsche

Mäi Affekäppsche

Von Anita Trostel

 

„Affekäppsche“ es kään offizielle Bezäschnung, dat hann mir dehäm emmer nur su isoahd.   Isch mähnen doamed die kläne Käppscha aus ruud/griene odder ruud/bloae Filzdreiecke, die en de 1950er Johre offikomme sein, wie ed reese modern iwoore es. Mäi Käppsche häd ruud/bloae Dreiecke ihad. Frejer häd ma emmer isoahd: „Ruud un bloa es Affetracht, wer dat drähd weerd ausilacht“. Desweje „Affekäppsche“. Villeischd wäs ähner vonn eisch noch die offizielle Bezäschnung.

 

Dat Käppsche es off de Hennerkopp isädzd un med zwei Schbängelscha an de Hoor festimachd woore. Subahl ma en Tour odder en Schullausfluch imachd häd, koam dat Affekäppsche off de Kopp, egal, ob bäi Jonge oadder bäi Mädscha. An denne Ausfluchsorde konnd ma Anschdäggnädelscha koafe, die ma dann an demm Käppsche festimachd häd. An denne Nädelscha konnd ma erkenne, ob äner schonn vill vareesed woor.

Die erschde Anschdäggnoadel an mäinem Käppsche woor vomm Drachefels, se woor aus Bläsch mem Schrefdzuch „Königswinter“ un nem rude Herzje drann, dat em Dun’gele ileuschd häd.

 

Emmer, wann mäin Ällere odder Gruußällere med de Feierwehr odder em Fraue- un Medderverein en Tour imachd hann, hann isch widder e Nädelsche fier mäi Käppsche medibraachd kreschd. Su koamen dann doch e paar zesamme, obwohl isch selwer ned su vill vareesd sein.

Isch kann misch noch besinne, dat isch Nädelscha vomm Kelner Dom, vonn de Drosselgass, vonn de Feindlische Breder en Kamp-Bornhofen un vonn de Tropfschdeinhöhl en Attendorn ihad hann.   Wann mir Pänz oas med denne Käppscha itroffe hann, woor emmer iguggt un vaglesche wer die meisde un die schiensde Nädelscha ihad häd un manschmoal hann ma och doamed ikodzelt.

 

Off jeden Fall woor isch schwer schdolz off mäi Affekäppsche un isch hann ed lang en Ehre ihahle, dann awer vagesse.

Eischendlisch es ed schad, dat isch su äbbes ned vawahrt hann, weil dat wat ganz typisches fier oas Kenner en de fuffzijer Johre em voarje Johrhonnerd woor.

Die Kommentare sind geschlossen.
nach oben