Naggeleräije zwescha Biewere un Sejendorfa

Naggeleräije zwescha Biewere un Sejendorfa

Naggeleräije zwescha Biewere un Sejendorfa

von Anita Trostel

Biewer un Sejendorf wooren frejer moa zwei ejeschdännije Därfa. 1910 sein se dann zesammeiläd woore zo Niederbieber-Segendorf. Vawaldungsmäßisch häd dat 60 Johr ganz good iklappt, soahn isch jedz moa aus mäiner Sischd als iboorene Biewere. 1970 sein se dann noa Näiwidd enimähnd un als Schdadtdeele widda idrännd woore.

En all denne Johre häd ma awer emma imärgt, dat Sejendorf reeschs vomm Widdbaach un Biewer links vomm Widdbaach läid. Su rischdisch zesamme ikomme es ma ned.  Wann se sisch doch moa idroffe hann, goaf ed emma klääne Schdischeläije. Die wooren ned bieß imähnd, dat wooren mieh su Naggeleräije.

Ähn Schdeggelsche well isch nau vazehle:

En Sejendorfa es moa iwwer de Schdeesch noa Biewer bäi de Dogda igange. Off der Tour es e vonn nem Hund anifalle woore un der häd imm ed Uur aafibesse un dat dann ifresse. Die Biewere hann demm arme Sejendorfa nadierlisch iholfe un hann inn noa Näiwidd en ed Kran’gehaus ifahre.

Doa anikomme, sähd der Nuudazd: „Doa hann se awer drodz allem noch Glegg em Unglegg. Mier hann grad vonn na Organschbände e Uur doa, dat können ma bäi inne annähe. Ed schammd alladings vonn nem Biewere.“

„Dat kimmd iwwerhoubd ned en Froach, an mäine Koabb kimmd ma kään Uur vonn nem Biewere“, häd der Sejendorfa sisch med Hänn un Feeß iwehrd. Die Dogdare hann off inn ennireed wie off en kran’ge Gaul , bes e dann zem goode Schluss „Joa un Amen“ isoahd häd.

Die Obarazion häd good iklappt awa noa zwei Daach woor der Sejendorfa duud. Un waremm? Dat Biewere Uur häd denn Sejendorfa Körba aafischduuse.

 

Kommentare sind geschlossen.