Beschdreggend schien

Beschdreggend schien

Beschdreggend schien

Von Anita Trostel

Jedz kimmd wat, wat vill Fraue besonnersch good kennen, awer mansche Männer kennen dat och un sein med Begeisdarung debei. Ed gähd em ed schdregge.

En de 1990ija Johre woor dat joa ganz aus de Mode ikomme, nur die “Griene” hann noch ischdreggt, em sisch vonn de Masse aafzeheewe. Wer doa als ned Griena noch ischdreggt oadda wat sälwa ischdreggdes anidoahn häd, der woor en aller Ooche joa suwat vonn reggschdännisch.

Awer mem 21. Johrhonnerd es dat schdregge su langsam widder modern iwoore un die Handawäidsischäfde un die Wollregale en de Koafhäiser sein iwweriquolle vier lauder Woll. Wie dat häid joa su es, koam zo de normale Woll och lauder Edelmaderial en die Ischäfde, Kaschmir, Merino, Säidegaar un Effektgaar wooren offeimoa „inn“. Die Frauezeitschrefde un die enschläije Sendunge em Fernsiehn hann die dollsde Sache ibraachd. Nau konnd ma Woll kräije, die besonnersch good vafilzt, frejer häd ma droff iguggt, dat se dat ned doat. Nau doarfd ma och Masche falle loasse, frejer woor dat en schlemme Fähler. Mansche Schdreggnoadele sein su digg, dat ma en Pulli en zwei Daach schaffd. Un plötzlisch sein sälwa ischdreggte Sogge widder anisoahd, die se en de Andischreggzeit als drambelisch bezäschend hann. Häid sein die Moddere, Ummas un Dande good ilidde, wann se Sogge schdreggen un liwweren. Isch brauchen doa nur an oas Meddwochsfraue em Backhaus ze dän‘ge, vonn denne häd jeda en Schdreggschdromb en Arwäid.

Vonn mäiner Umma had isch och Schdremb schdregge iliehrt, ed awer widder vagesse, die Meddwochsfraue hann misch widder droff ibraachd un nau sein schonn ädlische Sogge „Marke Anidda“ an mäiner un Annerläids Fees. Em Backhauslädsche sein oas Sogge och en ifroachde Adiggel.

Wat weerd häid ned alles ischdreggt. Die Sogge hann isch joa schonn erwähnd, dann gefd ed Medsche, Schaals un „Loops“, dat sein rond ischdreggde Schaals, Schdulbe fier de Hänn un de Bään, Täsche, Kessa, sugar Sedzkessa, Iwwerzisch fier Gläsa un Wase, Emhäng, ischdreggde Deere un, un, un. Em Indernet kann ma Ummas bewonnere, die die ausifallensde Sache noa Offtraach schdreggen, Reizwäsch fier de Fraue un fier de Wender wat warmes fier denne Männer ihr bäsd Schdegg sein doa kään Seldenheit. En de Schdädd es „urban knitting“ ganz inn, doa weeren Ladärnemasde, Hydrande, Boomschdämm un sons noch alles wat sisch ned wehrd beschdreggt.

Wo drann läid dat, dat widder ischdreggt weerd? Isch dän‘gen, dat die Läid widder geer wat sälwa mache wollen oadda dat se ed imüdlisch fennen, wann die Schdreggnoadele klabberen. Villleischd wollen se och widder zeregg zo de Nadur, wat wääs isch. Igal wat ed es, vonn mir aus kennen die Noadele noch lang klabbere, isch fennen dat schien und wann isch bäim fernsiehn Sogge schdreggen, schloafen isch och bäim langwäilischsde Programm ned en.

Wer vonn eisch och geer widder schdregge däd, ed awer nimmi su rischdisch kann, der es herzlisch bäi denne Meddwochsfraue enilade, die brängen ed eisch schonn widder bei, un imüdlisch es ed doa off jeden Fall och, besonnersch em Wender.

Die Kommentare sind geschlossen.
nach oben